LIGJET E BIZNESIT
Basha ka dhënë edhe një mesazh në mbrojtje të gazetarëve në takimin e sotëm me median. Në fund të fjalës së tij lideri demokrat tha se dënon të gjitha aktet e dhunës ndaj gazetarëve që kanë ardhur nga presioni policor, por edhe në rastet kur ka ardhur nga protestuesit.
Sipas Bashës fitimi i betejës që ka nisur Opozita do të sjellë për gazetarët lirinë e munguar mediatike që në këto 6 vite ka ardhur gjithmonë dhe duke u cunguar.
“Ju garantoj se përpjekja që po bëjmë sot nuk bëhet as për nesër apo pasnesër, por për 10-15 vitet e ardhshme, jemi shumë pranë fitores. Është në dorën tonë t’ia shkurtojmë ditët të keqes. Kam një falënderim të veçantë për të gjithë ju, gazetarët, operatorët, mbulimin që i keni bërë protestës, po të mos ishte për ju, që filmuan rrahjen barbare, nuk e di çfarë do të kishte ndodhur sot me Dollapin. Keqardhje për çdo gjë që u ka ndodhur si rezultat i dhunës, gazit apo ndonjë përplasje me ndonjë protestues të irrituar. U bëj thirrje protestuesve, mediat janë të pacenueshme, çdokush që i cenon nuk ka të bëjë më misionin tonë. Mediat janë të pacenueshme. Këta vajza dhe djem, burra dhe gra janë të pa cenueshëm. Iu garantoj që kjo betejë do të sjellë edhe lirinë e munguar për ju” deklaroi ai.
