Basha flet me emra, këta janë 5 kandidatët PS që kanë probleme me ligjin

Kryetari i PD, Lulzim Basha në takimin me qytetarët e Vorës ka folur për disa nga kandidatët PS në zgjedhje që kanë probleme me ligjin.

Sipas Bashës, janë kandidati i Durrësit, Dibrës, Lezhës, i Shijakut dhe ai i Tepelenës që akuzohen për krime të rënda, por Rama i ka kandiduar për të drejtuar bashkitë

“Shikoni se çka bërë: Pesë kandidatë të njohur publikisht nga listat e tyre janë të pandehur të drejtpërdrejtë të dosjeve hetimore për shitblerjen e votave. Valbona Sako, e dyshuar dhe sot duhet të ishte e pandehur për vjedhjen e votave me Ymer Lalën në Dibër, njësoj si Agron Malaj, njësoj si Dionis Imeraj, njësoj si Pjerin Ndreu. 4 kandidatë që në fakt duhet të ishin të pandehur dhe po të kishim drejtësi të pavarur, sot duhet të ishin të dënuar për shitblerjen e votës me krimin në zgjedhjet e Dibrës. Kemi edhe kandidatin e Shijakut, i cili sot duhet të ishte para drejtësisë si një nga njerëzit pjesëmarrës me bandën e Avdylajve, në shitblerjen masive të votave në Durrës. Në vend që këta njerëz të jenë para drejtësisë, Edi Rama do të diktojë përsëri zgjedhje me krimin. Do të diktojë përsëri Artur Bushin e krimit në Krujë e Tërmet Peçin e drogës në Tepelenë, e me dhjetëra të tillë anembanë vendit. Vora, Tirana dhe Shqipëria s’ka për ta pranuar kurrë këtë”- tha Basha.