Autoriteti Kombëtar i Ushqimit ka gjobitur me 26 milionë lekë dy subjekte tregtare të kripës në vend (Eurolab dhe N&N) si dhe ka bllokuar dhe hequr nga tregu 31.2 ton kripë me nivel të ulët jodi.
Në përmbushje të misionit të saj, për mbrojtjen e shëndetit të konsumatorit, me në fokus parandalimin, Autoriteti Kombëtar i Ushqimit bën me dije se vijon monitorimin/kontrollin e zbatimit të legjislacionit në fuqi nga Operatorët e Biznesit Ushqimor (OBU).
Së fundi, nga kontrolli i ushtruar në dy subjekte kryesore tregtuese të kripës në vend (“Eurolab” dhe ”N&N”), u konstatua gjendje e produktit “kripë” me nivel jodi nën normën e lejuar. Në këto subjekte, për mospërmbushjen e kërkesave ligjore për tregtimin e kripës ,u mor masa administrative “Bllokim” për sasinë 31.2 ton dhe masa administrative “Gjobë” në vlerën totale prej 2,6 milionë lekë.
‘Siguria ushqimore është prioritet i punës sonë, prandaj mbetemi të vendosur për të mos toleruar asnjë subjekt, i cili në kundërshtim me ligjin tenton të cënojë shëndetin e konsumatorëve. Me ndryshimet në Kodin Penal do të ashpërsohen masat ndëshkuese, duke përfshirë edhe dënimin me burg ndaj kujtdo që tenton të vendos në rrezik shëndetin e konsumatorëve. Siguria Ushqimore është sfida jonë e përbashkët’, thuhet ndër të tjera në njoftimin e AKU-t!
