Çështja e bashkimit të Shqipërisë me Kosovën është hedhur edhe një herë tjetër në tryezën e debatit. Ai që foli hapur për këtë çështje vetë presidenti i Kosovës, Hashim Thaçi. Por homologu i tij shqiptar, Ilir Meta, duket se mendon ndryshe për këtë çështje. Në një intervistë për Tv Dukagjini në Kosovë, Meta ka thënë se nëse ky bashkim ndodh nuk duhet të cenojë marrëdhëniet e të dyja vendeve me Bashkimin Europian.
Gazetari: Zoti Meta, a pajtoheni me homologun tuaj, Presidentin e Kosovës, zoti Thaçi, se duhet të hiqet ajo gërmadhë e kufirit mes Kosovës dhe Shqipërisë?
Presidenti Meta: Midis Kosovës dhe Shqipërisë duhet hequr çdo pengesë, që nuk cenon marrëdhëniet e Shqipërisë me Bashkimin Europian. Çdo pengesë duhet hequr. Heqja e taksës për shembull nuk e cenon këtë marrëdhënie.
Gazetari: Për cilën taksë po flasim që të mos kemi keqkuptime?
Presidenti Meta: Për taksën tonë, atë të Kalimashit.
Gazetari: Në rregull, që të sqarohemi për të mos pasur keqkuptime në mesin e një debati për taksën me Serbinë…
Presidenti Meta: Duhet të jemi i qartë. Çdo veprim që nuk cenon marrëdhëniet e Shqipërisë me Bashkimin Europian gëzon mbështetjen time të plotë.
Gazetari: Heqja e këtyre gërmadhave, a e cenon këtë marrëdhënie zoti Meta?
Presidenti Meta: Tani, kur flitet për gërmadha natyrisht që kemi të bëjmë me një simbolikë të caktuar. E theksoj, çdo gjë që nuk cenon integrimin e Shqipërisë në BE gëzon mbështetjen time të plotë sa i takon marrëdhënieve me Kosovën.
