Ushtria në Rinas, Xhaçka i përgjigjet Metës: Ja kur do të të pyes…

Olta Xhaçka, ministrja e Mbrojtjes ka qenë e ashpër në reagimin e saj ndaj Presidentit të vendit, Ilir Meta, i cili më herët ka kërkuar zyrtarisht informacion nga Shefi i Shtabit të Përgjithshëm të Forcave të Armatosura, mbi bazën ligjore të vendosjes së efektivëve të Policisë Ushtarake dhe Batalionit Special të Forcave të Armatosura në aeroportin “Nënë Tereza”.

Ministrja Xhaçka ka deklaruar se nuk është e nevojshme të njoftohet Presidenti, pasi vendi nuk po shkon në luftë.

“Nuk ka debat kushtetues. Nuk po shkojmë në luftë, nuk po diskutojmë dislokim trupash, po diskutojmë marrjen e masave të sigurisë, të një infrastrukture ushtarake. Policia jonë ushtarake e ka për detyrë një gjë të tillë, me sinjalizim të komandave, jo të ministrit, jo të shtabit të Përgjithshëm dhe assesi të Presidentit…

Nuk ka dislokim, por vetëm siguri për perimetrin e aeroportit. Nuk bëhet fjalë për siguri brenda, nuk është detyra jonë, ne do të garantojmë perimetrin e sigurisë së aeroportit.

Nuk është nevoja as të evokohet Kushtetuta, as ligje të caktuara, do t’u japim të gjitha përgjigjet të gjithë aktorëve, që mesa duket, nuk e njohin ligjin apo detyrën  dhe misionin e forcave të armatosura”, ka thënë Xhaçka.