LIGJET E BIZNESIT
Policia e Himarës u erdhi në ndihmë dy turistëve të huaj, të cilët kishin humbur në një zonë të thellë të Himarës. Dy turistë belgë kishin telefonuar policinë dje rreth orës 15:30 për ndihmë pasi kishin humbur në një zonë të thellë malore të Himarës.
15 policë u vunë në kërkim dhe pas 20 orësh i gjetën turistët belgë. Ata janë në gjendje të mirë shëndetësore dhe po transportohen nga policia për në hotel.
“Jemi të lumtur që ju shohim çuna”, shprehet njëri prej tyre në video.
Njoftimi i plotë:
Policia e Himarës u vjen në ndihmë dy turistëve të huaj të cilët kishin humbur në një zonë të thellë të Himarës.
Më datë 18.04.2019, rreth orës 15:30, dy turistë të huaj belgë (çift) kanë telefonuar Sallën Operative Vlorë dhe kanë kërkuar ndihmë se kishin humbur në një zonë të thellë malore të Himarës.
Menjëherë pas marrjes së informacionit, shërbimet e policisë Himarë kanë organizuar punën kërkimore për gjetjen e këtyre dy shtetasve duke u shpërndarë në terren rreth 15 forca policie.
Lokalizimi i tyre ka qenë tepër i vështirë pasi kushtet e këtij terreni janë tepër të thepisura dhe të thyera duke vështirësuar kështu komunikimin dhe gjetjen e tyre.
Pas 20 orë kërkimesh intensive në këtë zonë shkëmbore është bërë e mundur gjetja e tyre gati në majë të një mali midis fshatrave Vranisht dhe Iljaz të Himarës.
Ata kishin qenë duke ecur në këmbë me qëllim eksplorimin e turizmit malor të këtyre zonave.
Për shkak të terrenit të vështirë kishin ngatërruar rrugën e kthimit dhe për këtë kërkuan ndihmën e Policisë.
Theksojmë se turistët janë në gjendje të mirë shëndetësore dhe po bëhet transporti i tyre pranë hotelit bazë në të cilin ata po qëndrojnë.
Turistët kanë falenderuar Policinë për ndihmën e dhënë.
