Trondit Arben Ndoka: Po kërkoj vrasësit e vëllait, Prokuroria e Krimeve të Rënda u shërben atyre

Një deklaratë e fortë ka qenë ajo e ish-deputetit socialist, Arben Ndoka ndaj Prokurorisë për Krimet e Rënda, që dje urdhëroi sekuestrimin e pronave të tij me vlerë rreth 40 milionë eurove.

Në një intervistë për Fax News, Ndoka ka mohuar të ketë pronat e përmendura nga Prokuroria, ndërsa është shprehur se organi i akuzës është vënë në lëvizje pasi ai personalisht ka rritur intensitetin e kërkimeve për gjetjen e vrasësve të vëllait, Aleksandër Ndokës.
“Unë jam këtu për faktin që kam rritur intensitetin e kërkimeve për gjetjen e vrasësve të vëllait tim. Kjo ka bërë që personat që kanë organizuar vrasjen e vëllait tim të vazhdojnë misionin e papërfunduar, ta çojnë në fund nëpërmjet elementëve që përdorin mekanizmat dhe instrumentat që u jep shteti”, ka thënë ndër të tjera ish-deputeti.
Gjithashtu, Arben Ndoka ka shtuar se arrestimi i tij ka të bëjë me vrasjen e të vëllait, pasi ata kanë influencuar te Prokuroria e Krimeve të Rënda, që çështja të vazhdojë.

‘Natyrisht arrestimi im ka të bëjë me vrasjen e vëllait tim, sepse autorët janë po ata që po më nxjerrin probleme mua. Unë besoj se gjetjen e autorëve do ta bëj privatisht, pasi nuk besoj se prokuroria mund ta bëjë këtë gjë. Kam bërë kërkime privatisht, sepse nuk e kam pasur mbështetjen e organeve për vrasjen e vëllait tim’, u shpreh Ndoka.

Vëllai i Arben Ndokës, Aleksandër Ndoka u ekzekutua më 09 dhjetor 2017 në orët e para të mëngjesit në lagjen “Nënë Tereza” të Lezhës. Deri më tani, asnjë nga autorët nuk është dënuar.