Rama “përplaset” me Rudina Hajdarin

Revendosja e vizave nga Holanda ka bërë që të “përplasen” në Kuvend, kryeministri Edi Rama me deputeten Rudina Hajdari.

Gjatë kohës që Rama po fliste Hajdari është ngritur për të replikuar. Ajo shprehet se nuk është zgjidhje fajësimi i Partisë Demokratike dhe i opozitës për gabimet e qeverisë që nxitën votimin në parlamentin holandez.

“Më takon që të bëj një replikë si kryetare e grupit parlamentar demokrat. Kryeministri flet gjatë dhe nuk na e jep shumë mundësinë të flasim. Unë e shikoj shumë shqetësues vendimin e Holandës për rikthimin e vizave, po nuk jam dakord që kryeministri ia hedh fajin opozitës jashtë parlamentit. Kështu e gjen fajtorin për gabimet dhe gjërat që nuk janë përmbushur siç duhet”, ka deklaruar Hajdari.

Rama ia ka kthyer replikën deputetes demokrate, duke thënë që e ka cituar gabim, pasi nuk është shprehur se për vendimin e parlamentit të Holandës e ka fajin Partia Demokratike.

“Zonja Hajdari të më ndjeni, por e kam problem kur më citojnë gabim. Unë nuk thashë që për vendimin e parlamentit të Holandës e ka fajin Partia Demokratike rrugore apo Lëvizja Socialiste. Votimi është thjesht politikë elektorale në Holandë”, replikoi Rama.