Qeveria iu heq bashkive skemën e ndihmës ekonomike dhe atë të aftësisë së kufizuar. Ministria e Shëndetësisë dhe Mbrojtjes Sociale ka hedhur për konsultim publik ndryshimet në ligjin “Për asistencën sociale”.
Drafti parashikon që roli i Këshillave Bashkiakë të fokusohet vetëm në përcaktimin e kritereve për familjet që marrin ndihmë ekonomike, por nuk do të kenë asnjë vendimmarrje për përfituesit, të cilët do të përzgjidhen në bazë të sistemit të pikëzimit nga Drejtoria Rajonale e Shërbimit Social Shtetëror. Skema ekzistuese parashikon që qeveria jep fondin për familjet e varfra, por evidentimi i atyre që e përfitojnë dhe shpërndarja e parave bëhet nga pushteti vendor.
Gjithashtu, ligji i ri anashkalon vendimmarrjen e Këshillit Bashkiak për pagesat e aftësisë së kufizuar, për shkak se kjo e drejtë i jepet individit në bazë të vlerësimit të komisionit të posaçëm për vlerësimin e aftësisë së kufizuar.
