Përmirësohet situata tek Flamurtari. Në ndeshjet e fundit kuqezinjtë kanë bërë një performancë shumë të mirë. Vlonjatët kanë arritur të ngjiten në vendin e tretë të klasifikimit dhe tashmë kanë objektiva për të kapur Zonën Europiane.
Madje, në klasifikimin e përgjithshëm, ekipi i Vlorës ka lënë pas Teutën dhe Laçin. Kjo ka bërë që edhe presidenca të mendojë për të përmirësuar gjendjen financiare në ekip.
Presidenti Sinan Idrizi ka premtuar se ditën e hënë do të shlyhen të gjitha detyrimet financiare dhe futbollistët e Flamurtarit do të kenë në llogarinë e tyre pagesat përkatëse.
Një lajm shumë i mirë ky për vlonjatët, që të bëjnë më të mirën në 7 ndeshjet e mbetura. Mbështetje për skuadrën do të jetë edhe futbollisti Agustin Torass, i cili ka vendosur të rikthehet.
Argjentinasi nuk arriti të firmos në kampionatin kinez të futbollit dhe pritet që të aktivizohet sërish me kuqezinjtë. Me fanellën e Flamurtarit, 30 vjeçari është aktivizuar në sezonin 2018-2019, ku ka realizuar 2 gola në 16 paraqitje.
