LIGJET E BIZNESIT
Qeveria ka sulmuar koncensionarin e aeroportit Nënë Tereza, pas deklaratës që bëri një ditë më parë Tirana International Aeroport, ku theksonte se aeroporti ruhet nga Policia e Shtetit shqiptar dhe jo nga Kina.
Në një dalje publike para medias, ministrja e Infrastrukturës dhe Energjisë, Belinda Balluku ka deklaruar se detyrat që i janë lënë kompanisë koncensionare nuk janë marrë parasysh prej saj.
“Gjetjet dhe detyrat që i janë lënë kompanisë koncensionare, duke marrë vetëm nga korriku 2016 pas grabitjes së parë në pistën e këtij aeroporti kanë rënë në vesh të shurrdhët. Masat kanë qenë sipërfaqësore, të pamjaftueshme,sa për të kaluar radhën. Koncensionari ka vazhduar qetësisht vjeljen e kësaj kontrate, të gabuar që në gjenezë të saj dhe që nuk i ka lënë hapësirë shtetit shqiptar për ta penalizuar kompaninë kineze për dëmin që i ka shkaktuar Shqipërisë në drejtim financiar, sigurinë kombëtare dhe në drejtim të dëmtimit të imazhit”, u shpreh Balluku.
Ministrja deklaroi se taksa që kompania vjel, prej 3 euro për pasagjer nuk u përdor kurrë për investime serioze në shërbim të pasagjerëve. “Kutia e Pandorës është hapur tashmë dhe do të kemi kohë plot për të sqaruar mungesën e kushteve dhe detyrimeve për cilësinë e shërbimeve që kompania nuk plotëson. I vetmi investim që kompania kineze ka për zemër janë parkingjet, ku merr fitime të lehta”, akuzoi Balluku.
Duke dashur të kthejë përgjigje për deklaratën e TIA-s së aeroportin nuk e ruan Kina, ministrja pranoi paaftësinë e qeverisë për të penguar kompaninë që të valvisë flamujt kinezë në hyrje të aeroportit, një pamje që sipas saj, të bën të dukesh si në Pekin.
“Flamujt kinezë që valviten në hyrje të Shqipërisë se I tillë është hyrja e çdo aeroporti duket sikur je në Pekin. Qindra mesazhe marr unë në ditë nga qytetarë të indinjuar nga ajo pamje, por edhe kjo ka rënë në vesh të shurdhët”, u shpreh Balluku.
Ajo paralajmëroi masa për kompaninë koncensionare, pas takimit që do të zhvillojë me CEO-n e kompaninë kineze.
“Keni shpërdoruar këtë koncension në mënyrën më brutale, duke dëmtuar imahzin dhe cënuar sigurinë tonë kombëtare. Koha ka mbaruar…”, përfundoi ministrja.
