LIGJET E BIZNESIT
Futbollisti i famshëm i Tiranës dhe Kombëtares, Ali Mema, është ndarë nga jeta në moshën 76-vjeçare, si pasojë e një dëmundje të rëndë, ditën e djeshme. Të gjithë e kujtojnë me lëvizjet teknike e elegante në fushë Ali Memën.
Pas lajmit për ndarjen nga jeta të ish futbollistit ka reaguar edhe presidenti, Ilir Meta, me një reagim në “Facebook”, shprehet se Mema do të mbahet mend nga të gjithë sportdashësit si një futbollist i madh i viteve ’60-‘70
“Ndarja nga jeta e legjendës bardheblu Ali Mema, ish-mesfushorit virtuoz të ekipit të Tiranës dhe Kombëtares shqiptare, është një humbje e madhe për familjen, miqtë e dashamirësit, futbollin shqiptar dhe të gjithë ne.
Ali Mema do të mbahet mend nga sportdashësit shqiptarë si një nga lojtarët më të mëdhenj të brezit ’60-’70 dhe një prej figurave më të spikatura të trajningut, i cili ka lënë pas kontribute të jashtëzakonshme, të njohura e të vlerësuara edhe në arenën ndërkombëtare.
Emri i tij, i gdhendur me meritë me gërma të arta në historinë e futbollit shqiptar do të kujtohet gjithmonë, jo vetëm për autoritetin e padiskutuar në fushën e blertë, por edhe për vlerat e shkëlqyera njerëzore që rrezatonte, si frymëzim për brezat e rinj të çdo kohe.
Në këto momente hidhërimi, i shpreh përzemërsisht ngushëllimet më të sinqerta familjes Mema, të afërmve, miqve e tifozëve të panumërt të Ali Memës!”, shkruan Meta, teksa i përcjellë ngushëllime familjes.
