Përballje e fortë që u pasua me braktisje të studios televizive. Kjo ka ndodhur mes Lefter Maliqit, një nga kandiatatët e PD-së që pranoi të marrë mandatin e deputetit dhe Ervin Salianjit, që e dorëzoi atë.
Të dy ishin të ftuar në Abc News. Salianji nuk pranoi të që të qëndrojë në një tryezë me Maliqin, duke bërë që ky i fundit të largohej e më pas t’i bashkohej tryezës me një lidhje direkte nga zyra e tij.
“Nuk asnjë dilemë, nuk mund të dhe nuk do të ketë asnjë qëndrim të opozitari për çdo lloj mandati të grabitur të demokratëve apo LSI-së. Vendimmarrjen dhe votat, përfaqësimin e bëjnë forumet e partisë politike dhe nuk mund të jetë e pranueshme që mandatet e transferuara në favor të Edi Ramës të bëhen legjitime në diskurin publik.
Në hapësirën tuaj mund të ftoni kë të doni, pavarësisht qëndrimit. Nëse do kishit deputetë të PS-së, Po, por kurrsesi, dhe këtë e kam me Lefter Maliqin i cili ka dalur hapur për vota për PS-në dhe nuk mund të dalë sot me një mandat të PD-së”, tha Salianji.
Ndërkohë nga ana tjetër, Maliqi theksoi se mandati i tij nuk është i grabitur. Sipas tij, Basha ndryshe nga herët e tjera mbajti fjalën, ku në 2015-n i kishte premtuar kandidimin për kryetar bashkie.
“Do ishte kënaqësi të isha në atë përballje. E dëgjova. Të paktën për personin tim mandati nuk është i grabitur. Ka qenë i pritur dhe shumë i dëshiruar. Salianji e di mirë kontributin tim në qarkun e Beratit. Moralisht ndihem krenar për ata banorë që i përfaqësoj sado të zgjasë kjo iniciativë ligjore dhe kushtetuese.
Këto ditë kam qenë jo në dilemë, por thjesht kam parë reagimet dhe kam pritur. Këtë mandat përveç banorëve ma ka dhuruar dhe Basha. Përveç se ka stilin e tij të gënjeshtrës këtë herë mbajti fjalën. Të paktën me mua.
Premtimi i tij ishte që në 2015 do isha kryetar bashkie. Mua më vjen shumë keq që PD është katandisur në këtë farë feje. Do përfaqësoj demokratë dhe socialistë”, tha Maliqi.
