Rudina Hajdari reagon ndaj “përjashtimit”: Mirë që e mora vesh

“Mirë që e mora vesh!” Rudina Hajdari reagoi mbrëmë në Twiter, përmes një postimi në të cilin kishte vënë në dijeni gjithë personalitetet e huaja që njeh për deklaratën e sekretarit të marrëdhënieve me jashtë në PD, Gerti Bogdani.

Te “Dita Jonë”, në A2 CNN, ai tha që nëse ajo nuk do ta dorëzonte mandatin, do të ndiqej i njëjti standard si me Myslim Murrizin, për shkak të rregullit që vihet në zbatim kur shkelen vendimet e partisë.

Reagimi i zonjës Hajdari erdhi mbrëmë rreth mesnatës, kur për këtë situatë kishte folur edhe Sali Berisha. Në emisionin “360 gradë” të Artur Zhejit, ish-Kryeministri u shpreh se standardi statutor është i njëjtë për të gjithë. Por, zonja Hajdari zgjodhi të reagonte vetëm ndaj Gert Bogdanit.

Sipas A2 CNN, burime nga PD shprehen se nga të 194 emrat në listën zgjedhore të vitit 2017, 5 prej tyre nuk kanë firmosur ende dorëheqjen. Pas Rudina Hajdarit, e cila deri me tani ka lëne te kuptohet se nuk e djeg mandatin, janë dhe 4 të tjerë që nuk kanë firmosur. Përveç Lefter Maliqit, i cili që në fushatën e vitit 2017 u pozicionua me PS, janë edhe Ligoraq Karamelo, Erion Piciri dhe Selami Jenishehiri. 146 shkresat e mbetura të kandidatëve, pritet të depozitohen sot në KQZ.