Prindërit e Marvi Mihalit: Do marrim hak!

Përplasjet e forta mes familjarëve të Marvi Mihalit dhe prindërve të të akuzuarve për vrasjen e tij në sallën e gjyqit u bënë shkak për ndërprerjen e seancës në Gjykatën e Tiranës.

Përplasja mes tyre ndodhi në momentin kur të afërmit e të pandehurve pretenduan se familja Mihali ka kërkuar dëmshpërblim për jetën e të birit.  “Nuk bëj pazar me gjakun e djalit”, tha Fatmira Mihali, nëna e Marvit. Kaq mjaftoi qe situata të precipitonte në fyerje të ndërsjella.

Pala e akuzuar sikurse edhe më herët, këmbëngul se ka një padi për dëmshpërblim nga familja e të ndjerit. Familja Mihali ende beson tek drejtësia, por nëse një gjë e tillë nuk ndodh, ata paralajmërojnë se do të bëjnë vetëgjyqësi.

“Nuk e di, ky gjyq është për të bërë drejtësi për Marvi Mihalin apo ti lehtësuar. Prokurori tha se Eugen Bitraj dënohet me 18 vite sepse ka lehtësi për shkak se është dorëzuar. Nuk është dorëzuar, e nxori ai Artan Lulaj. E nxori ai, ishte brenda. Siç ikën dy të tjerët dhe po bëjnë pushime në ishujt e Greqisë. Ndërsa djali im po tretet në dhe. Jam e prekur nga shpifje të tilla. Ja thershin djalin në burg, dhe ta shikojnë a bëjnë dot pazare, ka çmim për gjakun për e fëmijëve të tyre. E provofshin në kurrizin e tyre dhimbjen e madhe që po përjetoj unë.”, tha Fatmira Mihali.

Ndërsa babai i Marvi Mihalit tha se “Katër kriminelë e deri të avokatë e te prokurori Artan Lulaj. Ky degracion duhet të marrë fund njëherë e përgjithmonë. Në momentin që nuk do bëhet drejtësi, e përsëris, atëherë le të funksionojë ligji i kuranit dhe i kanunit unë do flijohem se kam përballë kriminelë, baballarë kriminelësh. Si guxohen të cohën në sallën e gjyqit, e të na kërcënojnë, do të përballen me ligjin”. 

Për cenim të etikës, gjykata ndërpreu seancën dhe e shtyu në 26 mars.