Ndërsa jashtë Kuvendit po vazhdon e tensionuar protesta, në seancën plenare të kësaj të enjte, kanë bërë betimin deputetët e rinj të “opozitës”.
Ndër deputetët të cilët kanë pranuar mandatin duke bërë betimin në Kuvend kanë qenë: Adriatik Alimadhi dhe Arben Elezi.
Adriatik Alimadhi kreu i Ballit Kombëtar, ishte në listën e kandidatëve për deputetë të PD në qarkun e Vlorës në zgjedhjet parlamentare 2017. Alimadhi merr mandatin e Agron Shehaj, i cili iu bashkua vendimit ekstrem të opozitës së bashkuar.
Ndërkohë Arben Elezi i cili ishte në listën e kandidatëve per deputetë të PD në qarkun Elbasan, merr mandatin e djegur të Edmond Spaho.
Nga radhët e LSI, Ambra Borova, nuk ishte sot prezente në seancë plenare, dhe pritet të betohet në seancën e ardhshme.
Mungesën e Borovës ditën e sotme në Kuvend, në seancën e betimit, kreu Kuvendit Gramoz Ruçi, e ka justifikuar duke u shprehur se kishte “ arsyet e saj objektive, më madhore”.
