Djegia e mandateve nga opozita ka lënë shumë vende bosh në Parlament, të cilat kandidatët nuk nguruan t’i pranonin. Sot, Kryemadhi, iu drejtua me një letër KQZ-së në lidhje me deputetët që pranonin mandatin, duke thënë se është e paligjshme që ata ta marrin atë nga listat e LSI-së.
Ish-deputeti , Petrit Vasili, i ftuar në rubrikën “Opinion” në në Neës 24, sqaroi arsyen pse kryetarja e kësaj force mori atë vendime radikal.
“Ne qëndrimin tonë e kemi bërë publik prej kohësh. KQZ po bën një aksion antikushtetues dhe duhet të kenë parasysh të mos vazhdojnë se është shkelje e kodit zgjedhor. Kemi votuar në një sistem proporcional të pastër, me lista të mbyllura. Në zgjedhje është votuar vetëm për partinë dhe kryetarin, ai mbante përgjegjësi të ndërtonte listën. Për këto arsye nuk konkurron individi, por partia”, sqaroi Vasili.
I pyetur nëse Lefter Koka që vendosi të mos dorëzojë mandatin e deputetit ishte tradhtar, Vasili u përgjigj: “Zoti Koka s’përfaqëson asgjë për ne, përfaqëson vetëm veten e tij. Kush del kundër vendimit të partisë vetëpërjashtohet. Ne kemi vendosur të jemi kundër krimit dhe korrupsionit. Është zgjedhje e tij, por nuk mund të jetë më pjesë e LSI. LSI është vendosur qartë kundër kriminelëve që vendosin në tavolinë”, vijoi ai.
