Nis seanca në Kuvend, Rama: Situata njësoj si “çadra” e dy viteve më parë

Kryeministri Edi Rama, pak minuta më parë ka mbërritur në godinën e Kuvendit, për të lëvizur më vonë drejt Italisë. Ky ishte njoftimi i tij në nisje të fjalës së tij në Parlament. Ai tha se: “Më duhet të largohem drejt vendit fqinj për të shpjeguar situatën e shëmtuar që po ndodh në vend.”

“Nuk është një protestë popullore, por është një reagim brenda pallatit të politikës së opozitës, që për asnjë moment nuk pati sensin e realitetit dhe të reflektimit në radhë të parë. Ajo që ndodh sot është vijimi i një rruge pa krye. E vetmja gjë e re është vendimi politik vetëvrasës i opozitës. Jemi në kushtet e një sezoni të ri të një seriali të njohur. Nëse i bëni një thirrje të shpejtë kujtesës, kur 2 vite më parë në bulevard u ngrit në çadër, nga ku do ndërtohej një republikë e re, me një qeveri pa Edi Ramën kryeministër”, tha Rama per opoziten.

Ndërkohë, në sheshin para Parlamentit janë mbledhur protestuesit mbështetës të opozitës.  Ata kanë filluar të hedhin shashka dhe tymuse drejt kordonit të policisë.