Ndjesa e policisë për gazin, Vokshi: Këta të vrasin natën dhe të qajnë ditën

Drejtori i Përgjithshëm i Policisë së Shtetit, Ardi Veliu, sot iu ka dërguar një letër bizneseve në rrugën para Parlamentit përmes të cilës iu kërkon ndjesë gjithë biznesëve dhe klientëve të tyre për shqetësimin e krijuar si pasojë përdorimit të gazit lotsjellës gjatë protesës së datës 26 shkurt.

Veprimin e policisë, deputetja demokrate, Albana Vokshi e cilëson si të shtirur. Përmes një postimi në profilin e saj të ‘Facebook’, Vokshi e shprehet se policia është bandë e  kryeministrit Edi Rama.

Postimi i plotë i Albana Vokshit

Bandat me uniformë të Edi Ramës të vrasin natën dhe të qajnë ditën. Ndjesa e #policisë për bizneset pranë #parlamentit është tallje me qytetarët dhe hipokrizi e neveritshme.

Helmimi me lëndë kimike i protestuesve, fëmijëve, nxënësve të shkollës ekonomike, grave dhe nënave shtatzëna, banorëve dhe bizneseve të zonës është bërë me urdhër kriminal gjakftohtë për të trembur opozitën dhe qytetarët.

Pamjet tregojnë se kanë hedhur aq shumë gaz lotsjellës, sa kanë helmuar edhe njerëzit brenda qendrës tregtare pranë parlamentit.

Ftoj #bizneset dhe #banorët pranë Parlamentit të bashkohen me ne në #5Marspër të protestuar kundër qeverisë që për qytetarët e vet ofron vec helm, papunësi dhe varfëri.

Është shumë afër dita kur banda me uniformë e Edi Ramës do të mbajë përgjegjësi para ligjit për sjelljen e saj kriminale.