LIGJET E BIZNESIT
Bizneset po marrin kredi për t”i shpëtuar falimentit, që rrezikojnë nga mosrimbursimi i TVSH në kohë nga qeveria. Alarmi është dhënë në A2 Business Week të Aurora Sulçes në A2 CNN nga përfaqësues të sipërmarrjes.
“Problemi me rimbursimet e TVSH-së ka qenë ndër më të mëdhatë që kemi hasur vitin e kaluar. Bizneset kanë vështirësi me gjetjen e likuiditetit. Madje, një pjesë e tyre kanë kërkuar kredi nëpër banka që të shmangin falimentin dhe për të bërë pagesat”, deklaroi Arben Shkodra, sekretar I Shoqatës së Prodhuesve.
I ftuar në studio, ish ministri i Financave, Arben Malaj e konsideruar situatën shumë shqetësuese dhe deklaroi se po manipulohen shifrat e buxhetit.
“Kjo që ndodh me TVSH-në, ministrja e ka aq ekspertizë, për mua është edhe jo ligjore. Nëse nesër ndodh një auditim se çfarë ndodh me TVSH-në, kur krijohet dhe kur duhet paguar dhe me analizë risku, unë di shumë biznese që komunikojnë direkt me kryeministrin me po kërkojnë ndihmë.
Biznesi shqiptar dhe sidomos eksportet shqiptare po kërkojnë ndihmë, pasi janë duke u mbytur, për shkak të mungesës së likuiditetit. Ato para të papaguara tani rezultojnë si të ardhura, kur në fakt nuk janë të ardhura. Po manipulohen shifrat e buxhetit”, deklaroi Malaj.
Për ish ministrin e Financave, me borxhet që qeveria po krijon tek biznesi, dhe për të cilat ka shfaqur shqetësim edhe FMN, vendi ndodhet në fillimin e situatës të 2013-ës përpara largimit të ish qeverisë Berisha, që krijoi detyrime të pashlyerja në miliona euro tek sipërmarrja.
