LIGJET E BIZNESIT
Mesditën e sotme, Prokuroria përmes një deklarate ka akuzuar PD-në se ka kryer dy pagesa në shumën prej 650 000 dollarësh për efekt lobimi në SHBA, të cilat nuk i ka deklaruar ligjërisht.
Prokuroria tha se nga provat e administruara në dosje rezultojnë të jenë kryer dy pagesa në shumën prej 650 000 dollarësh për efekt lobimi në SHBA, të cilat nuk janë deklaruar ligjërisht nga subjekti PD.
I menjëhershëm ka qenë reagimi i PD-së ndaj deklaratës së Prokurorisë. Kjo forcë politike e konsideron të paligjshme deklaratën e Prokurorisë, duke e akuzuar këtë të fundit se po përdoret politikisht dhe po i shërben propagandës qeveritare kundër opozitës së vendit.
“Deklarata e sotme e Prokurorisë është e paligjshme, e gënjeshtërt, e paprecedentë, vetëdiskredituese dhe e gatuar politikisht.
Dalja me konkluzione hetimore ende pa përfunduar hetimin, si asnjëherë më parë në këto 30 vjet, tregon se Prokuroria po përdoret politikisht dhe po i shërben propagandës qeveritare kundër opozitës së vendit.
Partia Demokratike nuk ka shkelur asnjë ligj dhe ka deklaruar të gjitha shpenzimet e kryera në vitin 2017.
Pasi gënjeshtra e madhe që kishte ngritur për hetimin e Partisë Demokratike i plasi në dorë, pas informacioneve të ardhura nga SHBA dhe Skocia, Edi Rama në dëshpërim ka vendosur të përdorë sërish prokurorinë duke e kthyer nga institucion të ligjit në institucion qesharak propagande”, shkruhet në deklaratën e PD.
