Kryeministri i Kosovës, Ramush Haradinaj i është përgjigjur përfaqësueses së lartë të Bashkimit Evropian Federica Mogherini, e cila një ditë më parë në Këshillin e Sigurimit të OKB-së deklaroi se “Kosova duhet të heqë tarifën ndaj mallrave serbe dhe të Bosnjës”.
Nëpërmjet një postimi në Twitter, Haradinaj I kërkoi Mogherinit që të mos e lidhë vazhdimin e dialogut me taksën ndaj produkteve serbe.
“Dialogu kishte dalë nga binarët shumë kohë para se të vendosej taksa. Arsyet e vërteta janë mungesa e transparencës, propozimi për shkëmbim territoresh dhe dështimi i zbatimit të marrëveshjeve ekzistuese. Dialogu mund dhe duhet të rikthehet pa u ndërlidhur me tarifën”, thekson Haradinaj.
Dialogu mes Kosovës dhe Serbisë, me ndërmjetësinë e Bashkimit Europian, është ndërprerë që prej vendosjes së taksës doganore prej 100 për qind ndaj produkteve serbe dhe atyre të Bosnje Hercegovinës. Presidenti i Serbisë, Aleksandar Vucic ka deklaruar se nuk do të marrë pjesë në dialog, pa u hequr taksa.
