Ministri në Detyrë për Evropën dhe Punët e Jashmte, Gent Cakaj, në një komunikim për mediat ka bërë me dije vendimin që kishte marrë për institucionin që ai drejton.
Me sa duket ardhja e tij në ministrinë e Jashtme po shkakton “furtunë”. Në deklaratë Cakajt ka folur me tone të ashpra për administratën, ndërsa u shpreh se do të largohen nga puna 20 persona, por numri do të rritet. Sipas tij, Shqipëria nuk është e miqve, kushërinjve, klaneve apo krushqive.
“Largim nga puna për ata që nuk përmbushin detyrimet. Një pjesë tjetër e punonjësve do të transferohen për nevojat reale të punës. Ju informoj se numri i të prekurve nga kjo iniciativë informatorë do të shkojë mbi 20. Axhenda reformiste e kapërcimit të pellgut të shkuar nuk përkon me nepotizmin në asnjë sektor.
Duke vlerësuar njëkohësisht, hapjen e dyerve të shtetit për të rinjtë ekselentë të vendit si avantazh të madh që duhet shfrytëzuar e doemos për të ripërtërirë administratën tonë, komunikoj se kemi gati thirrjen publike për vakancat e krijuara nga vala e pastrimit në shërbimin tonë diplomatik, Shqipëria nuk është e miqve, kushërinjve, apo klaneve e kryshqive, por e të gjithë pa dallim dhe meriton të përfaqëohet nga të dalluarit që punojnë me mendje, shpirt e shërbejnë me pasion me kapacitet të plotë profesional e moral”, u shpreh me tona të ashpra Cakaj.
