Finalizohen ndryshimet në qeveri. Sot ikin drejtorët e Tatimeve, Doganave dhe Hipotekës. Pas këtyre ndryshimeve, bien në sy 2 vende të lakmuara, që çuditërisht nuk janë prekur nga ministrat e rinj.
Ardian Çela, i emëruar në 1 dhjetor 2014, e ka kaluar një mandat 4 – vjeçar në krye të Korporatës më të madhe shqiptare, por mbetet i paprekshëm.E dyta, me imunitet të pacënueshëm duket se është Frida Krifca, drejtoresha e AZHBR.
Shkarkimi i 3 drejtorëve sot, kompletoi zëvendësimin e drejtorëve më të rëndësishëm, që pasuan ndryshimet në Qeveri.
E nisi e para Belinda Balluku që, pasi largoi drejtorin e ARRSH, Afrim Qendro, i mori me radhë drejtoritë e rëndësishme, për të zëvendësuar të emëruarit e Gjiknurit me të besuarit e vet.
E njëjta gjë me Ministren e Financave, që e kishte nisur spastrimin e heshtur të njerëzve të Ahmetajt brenda Ministrisë, ndërsa sot mori firmën e Kryeministrit për shkarkimin e 2 drejtorëve kryesorë, doganat dhe tatimet.
Pas këtyre ndryshimeve, bien në sy 2 vende të lakmuara, që çuditërisht nuk janë prekur nga ministrat e rinj.
Belinda Balluku i mori nën kontroll drejtoritë kryesore të Ministrisë, por nuk ka mundur akoma të marrë OSHEE.
Ardian Çela, i emëruar në 1 dhjetor 2014, e ka kaluar një mandate 4 – vjeçar në krye të Korporatës më të madhe shqiptare, por mbetet i paprekshëm.
U përfol si kandidat për Bashkinë e Durrësit, por mesa duket, u tërhoq vet për të mbajtur OSHEE.
Lidhja e tij me Vangjush Dakon dhe direkt me kryeministrin, duket se i kanë dhënë imunitet ndaj gjithë ministrave.
E dyta, me imunitet të pacënueshëm duket se është Frida Krifca, drejtoresha e AZHBR.
Bledi Çuçi mund të ketë marrë frenat e Ministrisë së Bujqësisë, por drejtorinë më të rëndësishme, nuk mund ta kontrollojë.
Madje Krifca u përfol për shkarkim pas denoncimit të një biznesmeni, por ndërhyrja e një tjetër biznesmeni, akoma më të madh dhe me lidhje të forta politike, e mbajti në detyrë.
Madje zëra nga ministria thonë se Krifca përfaqëson aty “trustin” e luleshtrydheve, duke iu referuar biznesmenit që e mbajti në detyrë.
Këto 2 raste tregojnë se ndryshimet në drejtoritë e rëndësishme nuk kanë parasysh rezultatet, por mbështetjen politike dhe ekonomike dhe sigurisht,dëshirën e ministrave të rinj për të marrë në kontroll buxhetet e mëdha që kalojnë nga drejtorët./ Dosja.al
