Betohen në Kuvend 4 deputetët e rinj të opozitës

Betohen katër deputetët e rinj, që kanë dalë nga lista shumëemërore e LSI-së. Ata bënë betimin në seancën plenare në Kuvend dhe u ulën në vendet e opozitës. Deputetët e rinj janë Edmond Rrushi, Aurora Mara, Enver Roshi dhe Ylli Shehu.

Ndërkaq në seancën e sotme plenare mungojnë deputeti demokrat, Myslim Murrizi dhe ai i LSI-së, Lefter Koka, të cilët nuk lanë mandatet. Përpara fillimit të seancës, jashtë godinës së parlamentit ka folur për mediat deputeti I ri Ylli Shehu, i cili mori mandatin e lënë nga Floida Kërpaçi.

“Unë nuk jam pjesë e strukturave të LSI-së për të vendosur nëse jam apo jo. Nëse më përjashtojnë është e drejta e tyre, mandati është i imi. Po të ndihesha tradhtar nuk do të isha këtu. Nuk mund të tradhtoj mijëra qytetarë që më kanë votuar”, u shpreh Shehu. Ai ka deklaruar se në parlament do të bëjë opozitën dhe nuk do të mbështesë qeverinë.