Kuvendi i Shqipërisë ka nisur të plotësohet pas djegies së mandateve parlamentare nga ana e opozitës pak javë më parë.
Ndërkaq, tre emra të cilët ndodhën në listën e kandidatëve të LSI-së kanë nisur procedurën për të marrë mandatin, gjithashtu katër nga listat e PD-së.
Ditën e sotme PD ka dorëzuar në KQZ 37 dorëheqjet e kandidatëve të cilëve u ka shkuar njoftimi për të marrë mandatin.
Ka qenë përfaqësuesi ligjor i PD-së në KQZ, Ivi Kaso, i cili ka paraqitur në Institucionin Zgjedhor dorëheqjen e kandidatëve që janë në listat e saj zgjedhore.
Burime bëjnë të ditur se PD do të dorëzojë në KQZ dorëheqjet vullnetare të kandidatëve të saj, sa herë që atyre do i dërgohet nga KQZ kërkesa për të dorëzuar formularin e dekriminalizimit, që rrjedhimisht i hap rrugën marrjes së mandatit.
