Një grua pajetë është gjetur pajetë në afërsi të rezervuarit të njohur si “liqeni i Sharrës”, në Tiranë. Trupi i saj është gjetur pak pas orës 8 të mëngjesit. Pas verifikimeve nga forcat e rendit, u mësua që viktima është 49 vjeçarja, Lirie Xhepa. Ajo është qëlluar me tre plumba në trup ndërsa në pjesën e pasme të kokës është goditur me sende të forta.
Mësohet se viktima ishte larguar nga banesa që në mbrëmje pa lenë adresë. Pasi nuk ishte kthyer deri në mëngjes, djemtë e saj shkuan në komisariatin nr.6 për të denoncuar zhdukjen dhe aty morën edhe lajmin se nëna e tyre ishte ekzekutuar.
Trupi i viktimës është gjetur përmbys dhe e veshur lehtë, jo me xhup. Gruaja ishte e martuar dhe banonte pranë zonës ku u gjet e vrarë dhe e hedhur në ferra.
Grupi hetimor dyshon se bëhet fjalë për krim në familje. Në komisariat mësohet se janë shoqëruar 20 persona, për të cilët mendohet se kanë dijeni për ngjarjen.
Viktima, Lirie Xhepa, mësohet se ka pasur një konflik me kunatin, Dashamir Xhepa, i cili është i dyshuari kryesor për vrasjen, ndërkohë, është shpallur në kërkim policor.
Gjatë kontrollit në banesë, policia nuk e ka gjetur aty kunatin e viktimës. Policia po heton në disa pista, ku nuk përjashtohet edhe një lidhje intime mes viktimës dhe kunatit të saj që dyshohet se ka kryer vrasjen.
Banorët kanë dëshmuar se kanë parë një automjet ta transportojë viktimën në këtë zonë dhe më pas është larguar me shpejtësi.
