Rritet bilanci i viktimave, Maqedonia e Veriut shpall dy ditë zie

Të mërkurën në Maqedoninë e Veriut një autobus me rreth 50 pasagjerë doli rruga dhe u përmbys ndërsa udhëtonte në autostradën Shkup-Tetovë.

Pas përmbysjes së  autobusit, në kilometrin e shtatë të autostradës, 14 persona kanë humbur jetën, deri më tani.

Bilancin e ri e konfirmoi kryeministri Zoran Zaev pas një mbledhje të jashtëzakonshme me kabinetin qeveritar, gjatë së cilës u vendos që 14 dhe 15 shkurti të shpallen si ditë zie kombëtare.

“Një natë e vështirë, nuk kam fjalë për të shprehur ngushëllimet për familjet e viktimave. I mobilizuam të gjitha forcat, Qeveria mori vendimin që 14 dhe 15 shkurti të shpallen ditë zie. Reagimi i institucioneve ishte i shpejtë. Për fat të keq, 14 persona humbën jetën, 7 prej të cilëve në vendngjarje. 37 vetë janë shtruar në spital”, deklaroi kryeministri maqedonas.

Burimet bëjnë të ditur se autobuzi doli nga rruga pas shpërthimit të një gome. Ndërkohë, prokurori publik ka kërkuar që drejtuesi i autobusit t’i nënshtrohet ekzaminimeve të nevojshme.