Është shoqëruar me tensione seanca e sotme e Kuvendit të Shqipërisë. Ka qenë deputeti demokrat, Edi Paloka, i cili i hodhi bojë në fytyrën e kryeministrit Edi Rama, duke vonuar kështu seancën.
Në lidhje më incidentin ka reaguar kryeministri Rama në profilin e tij në Instagram ndaj deputetit të PD-së, Edi Paloka, pas bojatisjes me shiringë.
Rama bën ironi me shiringën, duke e quajtur penë, si dhe ironizon Palokën duke e konsideruar mendimtar, për ta zvogëluar përmes këtyre krahasimeve gjestin e tij.
“Pena e mendimtarit E.Th.Palotha pas një derdhjeje të fuqishme mendimesh mbi rolin e opozitës në zhvillimin e vendit”, shkruan Rama.
Kujtojmë që, i pranishëm në Kuvend ka qenë edhe kreu i Parlamentit të vendit fqinj, Talat Xhaferi. Gjatë fjalës së tij ai nuk nguroi të përmend incidentin ku Paloka i hodhi bojë në fytyrë Ramës, duke thënë: ”dua të sigurojë që këto situata nuk janë të parat, i kam kaluar të gjitha”.
