Rama e pranon për herë të parë: Shqipërisë mund t’i bllokohen negociatat

Kryeministri Edi Rama e ka quajtur një lajm të keq për demokracinë lënia e mandateve nga opozita. Në komunikimin e drejtpërdrejtë me qytetarët, kreu i qeverisë pranoi për herë të parë se kjo gjë mund të ndikojë në mos çeljen e negociatave me Bashkimin Europian në qershor të këtij viti.

“Është ditë e keqe për demokracinë shqiptare, e dëmshme për jetën politike, kjo është një zgjedhje destruktive, fatkeqësia e këtij vendi që goditet nga bijtë e vetë. Kjo mund të rezultojë fatale për çeljen e negociatave këtë vit, ashtu si pamjet e turpshme të së shtunës, që bënë xhiron e botës. Nuk jam për të fajësuar opozitën aspak, nuk jam i qetë që opozita sot është kthyer në shqetësim real për partnerët tanë SHBA dhe BE”,- tha kryeministri.

Kryeministri akuzoi opozitën se arsyeja e vërtetë që lanë mandatet ishte frika nga drejtësia e re. “Lanë mandatet se s’kanë pas popullin, por frikë nga drejtësia e re, që do ndajë politikanët e akuzuar që brenda politikës kanë bërë banjo për macen”, u shpreh Rama.