Pas incidentit ku Paloka njollosi me bojë Ramën, u tha se sulmi erdhi si pasojë e talljeve të vazhdueshme që kryeministri bënte ndaj tij.
Por jashtë ambienteve të kuvendit, Paloka tha para kamerave se ai nuk e njollosi Edi Ramën me bojë për t’u hakmarrë për talljet, por se ky veprim ishte vetëm fillimi i 16 shkurtit, datës kur do të zhvillohet protesta e opozitës.
“Nuk na përjashton Gramozi. Ai parlament është përjashtuar nga populli. Është parlament me vota të vjedhura.
Pashë disa komente që u hakmor Paloka, nuk ishte hakmarrje e Palokës, ishte hakmarrje e shqiptarëve që çdo ditë fyhen e vidhen nga një qeveri dhe kryeministër arrogant dhe i pacipë. As më intereson fare.
Është vetëm fillimi i 16 shkurtit, thojini që nuk ka parë realisht asgjë akoma” – u shpreh Edi Paloka.
Më herët debati në Kuvend vazhdoi edhe për disa minuta pasi Paloka refuzoi të largohej nga salla, pavarësisht thirrjeve të Kryetarit Gramoz Ruçi. Ndërkohë, pas mbledhjes së Byrosë së Kuvendit u vendos përjashtimi i Edi Palokës me 10 ditë nga punimet.
