Në pranga dy shtetas, goditën me tytën e pistoletës punonjësin e portit të Durrësit

Pas publikimit të denoncimit të ish-kryeministrit, Sali Berisha për dhunën ndaj punonjësit të shërbimit të Autoritetit Portual, policia e Durrësit njofton se ka arrestuar dy persona.

Shtetasit janë vënë në pranga pasi dyshohet se mbrëmjen e së hënës kanë dhunuar punonjësin e shërbimit. Bëhet fjalë për shtetasit R.D.,38 vjeç, dhe H.B., 40 vjeç, ndërsa është shpallur në kërkim një person i tretë, i dyshuar si përfshirë në këtë ngjarje.

Sipas policisë, arrestimi i këtyre personave është bërë pasi dyshohet se në hyrje të Portit kanë goditur me sende të forta në kokë (dyshohet tytë pistolete), punonjësin e shërbimit të Autoritetit Portual, i cili po merr ndihmë në spital.

Sakaq, materialet i kaluan Prokurorisë pranë Gjykatës së Shkallës së Parë Durrës, për veprat penale “Plagosja e rëndë me dashje”, “Mbajtja pa leje dhe prodhimi i armëve, armëve shpërthyese dhe municionit”, “Goditja për shkak të detyrës”, kryer në bashkëpunim. Policia ka nisur hetimet për identifikimin dhe kapjen e autorit të tretë të kësaj ngjarje.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern