Kuvendi anulon seancën, Basha apel: Mos mungoni nesër në protestë!

Këshilli Kombëtar i Partisë Demokratike ka miratur me unanimitet djegien e mandatit për deputetët e kësaj partie. Vendimi u përcoll nga duartrokitje të forta nga anëtarët.

Lideri i PD-së, Lulzim Basha, doli nga selia e Partisë Demokratike duke thënë se ”përmes këtij vendimi të paprecedent, ne synojmë të çojmë deri në fund vlerat evropiane”.

Basha ka konfirmuar se opozita do të protestojë ditën e nesërme në orën 10:00 para parlamentit.

‘Në këtë 20 shkurt, 28 vite pas rrënies së bustit, kurrë më nuk do të lejojmë që në Shqipëri të mos zhvillohen zgjedhje të ndershme. Kurrë më parlamenti të mos kthehet në një fole krimi. Ne e hedhim këtë hap, pasi nuk na mbetet asnjë rrugë tjetër. Ne këtë betejë të madhe ne do ta fitojmë bashkë. Prandaj ju ftoj, askush të mos mungojë’, tha Basha.

Kujtojmë, rreh një orë më parë kryetari i Parlamentit, Gramoz Ruçi njoftoi se anulimin e seancës plenare, të ditës së nesërme. Sipas tij, ky vendim është marrë për t’i krijuar opozitës hapësirat reflektuese që të rikthehet në Kuvend, por edhe në bazë të informacioneve për trazira të mundshme brenda dhe jashtë Kuvendit. Pavarësisht vendimit të mazhorancës, opozita e bashkuar sërish vazhdon planin për protesë.