Një grua është gjetur pajetë në afërsi të rezervuarit të njohur si “liqeni i Sharrës”, në Tiranë, ditën e djeshme. Trupi i saj është gjetur pak pas orës 8 të mëngjesit. Pas verifikimeve nga forcat e rendit, u mësua që viktima është 49 vjeçarja, Lirie Xhepa. Ajo është qëlluar me tre plumba në trup ndërsa në pjesën e pasme të kokës është goditur me sende të forta.
Mësohet se viktima ishte larguar nga banesa që në mbrëmje pa lenë adresë. Pasi nuk ishte kthyer deri në mëngjes. Specialistët mendojnë se 49-vjeçarja është vrarë në një tjetër vend dhe më pas trupi i saj u soll atje ku edhe u gjet, nga autori ose autorët.
Lirie Xhepa jetonte bashkë me djalin e saj dhe shtëpia ndodhet vetëm 200 metra larg vendit, ku ajo u gjet e pajetë.
Dashamir Xhepa, kunati i saj, është shpallur në kërkim, si autor i dyshuar i vrasjes, për shkak se nuk e lejonte që Liria të krijonte një lidhje të re dashurie, pasi bashkëshorti i kishte vdekur 10 vite më parë. Dy prej djemve të 49-vjeçares janë emigrantë dhe jetojnë prej vitesh jashtë shtetit, ndërsa një tjetër ndodhet në burg.
Ajo jetonte vetëm me djalin tjetër adoleshent, ndërsa fqinjët thanë se kjo familje njihej si e rregullt. Trupi i pajetë i saj u dërgua në morgun e Tiranës, për t’iu kryer ekspertiza, ndërsa janë marrë në pyetje edhe familjarë të tjerë dhe banorët e zonës.
Lirie Xhepa është e shtata femër e vrarë brenda pak javëve.
