Kryemadhi paralajmëron: Po të duam ia vëmë flakën Ramës në Parlament

Pak para mbarimit të protestës kryetarja e LSI-së, Monika Kryemadhi ka hedhur akuza të forta kundrejt Kryeministrit dhe policisë.

Sipas saj, dhunuesit kanë qenë provokatorë të policise, ndërsa protestuesit kanë qenë paqësorë.

“10 veta që kanë shfaqur sjellje agresive mund të ndaloheshin nga 1300 policë nëse do të donin”,  është shprehur Kryemadhi.

Sakaq, u shpreh se protesta ishte paqësore: “ne po të duam ia vëmë flakën në parlament”, ishin këto fjalët e Kryemadhit.

Deklarata e plotë:

“Nuk largohemi. Ne do të qëndrojmë këtu. I bëjmë thirrje ambasadorëve të shikojnë videot e qytetarëve, që kanë qenë mbi 100 mijë shqiptarë. Edi Rama e di shumë mirë që po të duam e nxjerrim Ramën për 10 minuta. Këtu ka pasur protestë paqësore dhe njerëz qytetarë.

Ne i bëjmë thirrje të ndalojnë dhunuesit. Ata janë provokatorë të policisë. Pse nuk i ndalon policia ato 10 dhunues. Janë 1300 policë.  Të angazhoj strukturat e mija për dhunuesit e Ramës?!

Ne po të duam ia vëmë flakën në parlament, ia bëjmë më keq se Edi Paloka. Rama përmes provokimit do të bëjë rolin e viktimës por viktimat janë qytetarët. Flas për plumbat e gomës që ka hedhur policia apo dhe gazin lotsjellës. Nuk do të lëmë të hysh në zyrë”, është shprehur kryetarja e LSI-së, Monika Kryemadhi.