Në këtë realitet të ri, teknologjia dhe inovacioni ecin paralelisht me evolucionin e nevojave dhe sjelljes së konsumatorit. Ato transformojnë kështu mënyrën sesi ne zgjedhim, konsumojmë dhe përjetojmë, duke u integruar natyrshëm në ritmin e jetës moderne. Në të njëjtin ritëm evoluon kështu edhe mënyra sesi ne kërkojmë të menaxhojmë financat tona, duke i dhënë gjithnjë e më shumë vlerë shërbimeve që ofrojnë jo vetëm fleksibilitet, shpejtësi, siguri por njëherazi një eksperiencë të personalizuar.

Në këtë dinamikë ndryshimesh të vazhdueshme, Credins bank e ka kthyer risinë në një element të rëndësishëm të vizionit të saj, i cili merr formë përmes ofrimit të shërbimeve dhe produkteve të veçanta. Përtej vlerës financiare, Credins synon tashmë të ofrojë një eksperiencë unike, në harmoni me një mënyrë gjithnjë e më të rafinuar të të jetuarit.

Në këtë frymë vjen edhe lançimi i produktit më të ri nga Credins bank, Visa Infinite, karta e parë metalike në Shqipëri, e cila është e nivelit më të lartë në hierarkinë e produkteve Visa. E konceptuar si një produkt financiar elitar që ndërthur fleksibilitetin financiar me një gamë të gjerë privilegjesh dhe shërbimesh premium, Visa Infinte vjen për një nivel tjetër ekskluziviteti experience.

E projektuar për individë me profil të lartë financiar, sipërmarrës, drejtues biznesesh, etj, Visa Infinite shënon një tjetër hap të rëndësishëm në zgjerimin e portofolit premium të Credins. Visa Infinite e shfaq karakterin e saj dominant që në elementin e parë visual. Një kartë metalike, elegante në linja dhe e rafinuar në çdo detaj. Visa Infinite ofron njëkohësisht të gjithë funksionalitetin e një karte krediti, nga pagesat në terminale fizike dhe online, deri te përdorimi përmes Google Pay dhe Apple Pay.

Funksionalitet që pasurohen më tej nga një gamë shërbimesh të dedikuara, brenda dhe jashtë vendit. Por ajo që e bën speciale shkon përtej estetikës. Mundësi financiare të një niveli ekskluziv, shërbime të dedikuara dhe privilegje të përzgjedhura ndërthuren në një produkt të vetëm, menduar për ata që dinë të zgjedhin me kujdes, vlerësojnë cilësinë e jetës dhe e konsiderojnë komoditetin pjesë të natyrshme të përditshmerisë së tyre.

Por çfarë do të thotë në të vërtetë të kesh në duar një Visa Infinite? Ku qëndron sekreti i fuqisë së saj? E thjesht, ta jetosh jetën sipas stilit tend…! Të udhëtosh dhe aeroportet të mos jenë më sinonim i pritjes dhe lodhjes. Të kalosh përmes Fast Track, të kesh akses në mbi 1,200 lounge në mbarë botën dhe ta ndash këtë privilegj edhe me të tjerë.

Ky është një tjetër dimension i udhëtimit, ku çdo etapë të jep privilegje në çdo detaj. Sigurimi ndërkombëtar i udhëtimit, me mbulim mjekësor deri në 2,5 milionë dollarë, sjell ndoshta luksin më të çmuar, qetësinë për t’u nisur pa shqetësimin për të papriturën. Vonesat apo anulimet e fluturimeve, bagazhet e vonuara, makinat me qira apo aktivitetet sportive janë vetëm disa nga situatat që përfshin paketa e gjerë e sigurimit Visa Infinite.

Me mbulime që shkojnë nga rimbursimi i shpenzimeve të shkaktuara nga vonesat e fluturimeve apo bagazheve, e deri te sigurimi i makinave me qira dhe aktiviteteve sportive, paketa krijon një nga strukturat më të plota të përfitimeve që shoqërojnë kartën gjatë udhëtimit. Edhe blerjet mbajnë sërish firmën e kësaj karte magjike, ku në rast humbjeje, vjedhjeje apo dëmtimi aksidental, ato gëzojnë mbrojtje deri në 360 ditë nga momenti i blerjes.

Koncepti premium i Visa Infinite shkon edhe më tej, duke vendosur në qendër asistencën e personalizuar. Përmes Visa Concierge, klienti ka në dispozicion një shërbim të dedikuar për rezervime hotelesh e restorantesh, organizim udhëtimesh apo sigurimin e biletave për evente, ndërsa Visa Chatbot ofron akses 24/7 në informacion mbi përfitimet, ofertat dhe privilegjet e kartës.

Global Client Support Service, është një tjetër benefit që siguron asistencë në mbarë botën në raste si humbja apo vjedhja e kartës, zëvendësimi emergjent apo sigurimi i fondeve në raste emergjence. Paketën e plotëson dhe një tjetër benefit special, paketa mobile 9 GB roaming në 127 shtete. Një lehtësi kjo për klientët që udhëtojnë shpesh dhe duan ta kenë botën vetëm një telefonatë larg. Përfitimet shtrihen edhe në një gamë ofertash të tjera me zbritje të dedikuara për kartat premium. Mes tyre përfshihet edhe 50% zbritje për transfertat me Uber drejt aeroportit, si edhe oferta të tjera speciale që mund të aksesohen përmes Visa Chatbot.

Në këtë aspekt, Visa Infinite u drejtohet klientëve që kërkojnë më shumë nga një produkt financiar dhe që dinë të zgjedhin shërbime në perputhje me profilin/statusin dhe stilin e tyre të jetesës. Përfitimet e saj ndërkombëtare, asistenca e personalizuar dhe mundësitë që ofron e bëjnë kartën një zgjedhje të dedikuar për një klientelë që vlerëson ekskluzivitetin në çdo detaj.

E konsideruar si një nga produktet më premium në Shqipëri, mbetet tashmë që çdokush ta zbulojë dhe shijojë me të gjitha privilegjet që Visa Infinite ofron ekskluzivisht nga Credins bank. Me lançimin e këtij produkti Credins shënon sërish një tjetër hap strategjik të rëndësishëm në zhvillimin e segmentit premium dhe diversifikimin e portofolit të saj. Ky produkt, rikonfirmoi edhe një herë vizionin ambicioz mbi zhvillimin e produkteve sa elitare, po aq edhe inovatore, duke sjell në tregun shqiptar standardet më të larta të shërbimit finananciar ndërkombëtarë.

The post Credins bank sjell Visa Infinite, kartën e parë metalike në Shqipëri! appeared first on Fast News Economy.

Shtimi i remitancave është pasojë e emigrimit të vazhdueshëm e pandalshëm vitet e fundit. Këto flukse valutore kanë qenë në rritje të vazhdueshme. Vitin e kaluar ato kaluan nivelin e 1.1 miliardë eurove, duke qenë një burim i rëndësishëm i financimit të ekonomisë.

Rritja në nivele rekord e këtyre flukseve valutore është një dnër arsyet e rënies së euros në tregun tonë të këmbimit. Pasi pjesa më e madhe e emigrantëve shqiptarë, kryesisht emigrantëve që janë larguar në 10 vitet e fundit, jetojnë dhe punojnë në vendet europiane, duke i sjellë dërgesat në euro. Rrjedhimisht, remitancat kanë shtuar sasinë e mondhës europiane në treg, duke ushtruar presion në rënien e vlerës së saj.

The post Dërgesat e emigrantëve në nivele rekord, 621 milionë euro vetëm në 6 muaj appeared first on Fast News Economy.

Vendimi ishte gjerësisht i pritshëm nga tregjet dhe vjen pasi rritja e fortë e çmimeve të naftës dhe gazit e çoi inflacionin në Eurozonë mbi 3% gjatë muajit të kaluar, dukshëm mbi objektivin prej 2% të BQE-së. Përshkallëzimi i konfliktit me Iranin dhe kufizimet në furnizimet energjetike kanë shtuar shqetësimet se çmimet e larta të energjisë mund të fillojnë të përhapen edhe te mallrat dhe shërbimet e tjera.

“Perspektiva mbetet shumë e pasigurt, me rreziqe në rritje për inflacionin dhe në rënie për rritjen ekonomike”, deklaroi BQE pas mbledhjes së Këshillit Drejtues, e zhvilluar këtë herë në Berlin. BQE rriti gjithashtu parashikimin për inflacionin. Banka pret tashmë që rritja mesatare e çmimeve të jetë 3.0% në vitin 2026 dhe 2.5% në vitin 2027.

Në të njëjtën kohë, parashikimi për rritjen ekonomike të Eurozonës këtë vit u përmirësua lehtë në 0.9%, nga 0.8% që vlerësohej në qershor. Norma e depozitave prej 2.5% ndodhet tashmë në kufirin e sipërm të intervalit që politikëbërësit e BQE-së e konsiderojnë “neutral”, pra një nivel që në teori as nuk nxit dhe as nuk frenon ekonominë.

Megjithatë, sinjalet për hapat e ardhshëm mbeten të përziera. Investitorët po parashikojnë rritje të tjera të normave gjatë pjesës së mbetur të këtij viti dhe në 2027, por BQE pritet të lëvizë me kujdes, për shkak të pasigurisë së lartë mbi ecurinë e ekonomisë dhe inflacionit. Presioni kryesor aktualisht po vjen nga energjia.

Çmimet e naftës kanë kaluar sërish mbi 100 dollarë për fuçi, ndërsa edhe gazi natyror është shtrenjtuar ndjeshëm.

Rezervat europiane të gazit janë gjithashtu nën nivelet historike përpara sezonit të dimrit, duke shtuar rrezikun e kostove më të larta të energjisë në muajt e ardhshëm.

Nga ana tjetër, BQE ende nuk sheh prova të forta se goditja nga energjia është përhapur gjerësisht në ekonomi. Inflacioni bazë, që përjashton çmimet më të luhatshme të ushqimeve dhe energjisë, u ngadalësua muajin e kaluar, ndërsa edhe rritja e pagave po humbet ritëm. Edhe tregjet e obligacioneve po e bëjnë një pjesë të punës së bankës qendrore.

Yield-et janë rritur ndjeshëm javët e fundit, duke shtrënguar vetvetiu kushtet e financimit për familjet dhe bizneset. Megjithëse presionet mbi çmimet janë shtuar, ato mbeten shumë më të ulëta se në vitin 2022, kur inflacioni në Eurozonë kaloi 10% pas rritjes së fortë të kostove të energjisë që pasoi pushtimin rus të Ukrainës./ Reuters

The post Kriza e çmimeve/ BQE rrit normat e interesit në 2.5%, për herë të dytë këtë vit appeared first on Fast News Economy.

Hartuar nga Forbes në bashkëpunim me Statista, klasifikimi vlerëson bankat bazuar në tregues objektivë të performancës financiare. Renditja vlerëson institucionet financiare që arrijnë të ruajnë rritje të qëndrueshme, përfitueshmëri të lartë, pozita solide kapitali dhe financimi, si dhe cilësi të lartë të aktiveve gjatë një periudhe shumëvjeçare.

“Historia e OTP Group është unike. Gjatë dekadave të fundit kemi ndërtuar një nga grupet bankare lider në Evropën Qendrore dhe Lindore përmes rritjes së qëndrueshme organike, blerjeve të suksesshme dhe një modeli operimi të disiplinuar. Ajo që e bën këtë vlerësim veçanërisht të rëndësishëm është fakti se ai njeh aftësinë tonë për të kombinuar rritjen e shpejtë, përfitueshmërinë e jashtëzakonshme dhe qëndrueshmërinë afatgjatë. Ky ekuilibër ka qenë në thelb të strategjisë sonë prej shumë vitesh.” – u shpreh z. Péter Csányi, Drejtor i Përgjithshëm i OTP Bank.

Ky klasifikim përbën një tjetër vlerësim të rëndësishëm ndërkombëtar për performancën e OTP Group. Më herët gjatë këtij viti, Grupi u përfshi mes 400 kompanive më të mëdha në botë në renditjen Forbes Global 2000, ndërsa në renditjen më të fundit të performancës bankare evropiane nga S&P Global Market Intelligence, OTP Group u pozicionua mes dy bankave me performancën më të mirë në Evropë, për të tretin vit radhazi.

RRETH GRUPIT OTP

Grupi OTP është një nga grupet bankare me rritjen më të shpejtë dhe një nga më të rëndësishmit në rajonin e Evropës Qendrore dhe Lindore, me përfitueshmëri të lartë dhe një pozicion të qëndrueshëm kapitali dhe likuiditeti. Me rreth 41,000 punonjës në 11 vende të Evropës Qendrore e Lindore dhe Azisë Qendrore, Grupi ofron një gamë të plotë shërbimesh financiare për rreth 17.5 milionë klientë.

Si konsoliduesi më aktiv i sektorit bankar në rajonin e Evropës Qendrore dhe Lindore, Grupi OTP ka realizuar me sukses blerjen dhe integrimin e 25 bankave që nga fillimi i viteve 2000. OTP Group ka selinë qendrore në Hungari dhe një strukturë pronësie të diversifikuar dhe transparente. Grupi Bankar është i listuar në Bursën e Budapestit që prej vitit 1995.

The post Grupi OTP renditet si banka evropiane me performancën më të lartë në klasifikimin global të Forbes, për vitin 2026 appeared first on Fast News Economy.

Ceremonia, e zhvilluar në ambientet e Bankës së Shqipërisë, u çel me fjalët përshëndetëse të Guvernatorit të Bankës së Shqipërisë, z. Gent Sejko, dhe z. Francis Malige, Drejtor Menaxhues për Institucionet Financiare në BERZH.

Në fjalën e tij, Guvernatori Sejko e vlerësoi këtë nismë si një angazhim të rëndësishëm që synon të mbështesë zhvillimin e sipërmarrjes së grave, përmes një qasjeje të bazuar në të dhëna, bashkëpunimit institucional dhe veprimeve konkrete. Në Shqipëri, Banka e Shqipërisë ka marrë rolin e koordinatores kombëtare, duke udhëhequr ndërtimin e një ekosistemi të përbashkët të institucioneve publike dhe financiare që angazhohen për një treg financimi më gjithëpërfshirës.

Në vijim, Guvernatori vuri në dukje angazhimin e Bankës së Shqipërisë për ndërtimin e një sistemi financiar modern, përmes infrastrukturës financiare bashkëkohore, zgjerimit të aksesit në shërbimet financiare, forcimit të edukimit financiar, si dhe përmirësimit të cilësisë dhe përdorimit të të dhënave financiare.

Në përfundim, Guvernatori Sejko vlerësoi bashkëpunimin e të gjithë aktorëve të përfshirë në këtë nismë dhe theksoi se suksesi i saj do të matet nga mundësitë reale që do të krijohen për gratë sipërmarrëse në vend.

Një nga rezultatet konkrete të nismës është krijimi i panelit analitik kombëtar të financimit të MSME-ve. Ky instrument krijon një bazë të re njohurie për tregun, duke bërë të mundur analizimin e integruar të informacionit mbi kreditë dhe depozitat me karakteristikat e bizneseve – si gjinia e pronësisë, madhësia e ndërmarrjes, sektori ekonomik, rajoni dhe forma juridike. Paneli do të jetë i aksesueshëm për publikun në faqen zyrtare të Bankës së Shqipërisë dhe do të shërbejë si një instrument i ri për analizë, transparencë dhe vendimmarrje të bazuar në të dhëna.

Në vijim të ceremonisë u zhvillua një panel diskutimi me pjesëmarrjen e Zëvendësguvernatores së Dytë të Bankës së Shqipërisë, znj. Natasha Ahmetaj, dhe të përfaqësuesve të sektorit bankar dhe të institucioneve publike, ku u diskutua se si bashkëpunimi ndërinstitucional dhe përdorimi i të dhënave mund të mbështesin zhvillimin e produkteve financiare më të përshtatshme dhe politikave më efektive për sipërmarrjen e grave.

Lançimi i “WE Finance Code Albania” shënon fillimin e një procesi afatgjatë, në të cilin institucionet nënshkruese do të punojnë së bashku për të përmirësuar cilësinë e të dhënave, për të monitoruar progresin dhe për të krijuar kushte më të favorshme për zhvillimin e sipërmarrjes së grave në Shqipëri.

Banka e Shqipërisë do të vijojë të kontribuojë, në përputhje me mandatin e saj, për një sistem financiar modern, të qëndrueshëm, efikas dhe gjithëpërfshirës, duke mbështetur zhvillimin e infrastrukturës financiare, cilësinë e statistikave dhe vendimmarrjen e bazuar në të dhëna.

The post BSH dhe BERZH prezantojnë Kodin për Financimin e Grave Sipërmarrëse appeared first on Fast News Economy.

Sipas BSH-së, yield-i mesatar i ponderuar dhe kuponi i obligacioneve 20-vjeçare në ankandin e rihapjes së kësaj jave u rrit në 6.54%, nga 6.5% që kishte qenë në ankandin e emetimit fillestar të këtyre instrumenteve, në muajin maj.

Kërkesa në ankand rezultoi në përmirësim të ndjeshëm krahasuar me ankandet e fundit të instrumenteve të borxhit afatgjatë. Nga 1.5 miliardë lekë që ishte shuma e shpallur për financim, vlerë totale e kërkesave në ankand arriti në më shumë se tre miliardë lekë. Ministria e Financave zgjodhi ta rrisë vlerën e emetimit në 1.725 miliardë lekë. Kjo e rriti disi yield-in në ankand, që sipas rregullores është uniform me atë të kërkesës më të lartë të pranuar.

Pavarësisht rritjes së lehtë, ankandi i obligacioneve 20-vjeçare solli një zbutje të pjerrësisë së kurbës së yield-eve të titujve qeveritarë.

Kjo mund të shpjegohet kryesisht me rritjen e kërkesës së investitorëve ankand. Nga ana tjetër, perspektivat e normave të interesit ngelen të pasigurta, por duket se skenari më i mundshëm ngelet ai i një rritjeje, qoftë edhe të moderuar, brenda këtij viti.

Tensionet gjeopolitike në Lindjen e Mesme po i mbajnë të larta çmimet e naftës. Kjo po reflektohet në çmime të larta të karburanteve. Çmimi i gazoilit në pikat e shitjes me pakicë ka arritur pranë kufirit të 220 lekëve. Qeveria nuk ka dhënë sinjale për lehtësi fiskale që mund të sjellin ndonjë zbutje të rëndësishme të çmimeve, ndërsa Bordi i kontrollit të tyre gjithashtu është shfuqizuar prej muajsh.

Në këto kushte, është e ngjashme që inflacioni do të vazhdojë të rritet gjatë muajve në vazhdim, ndërsa në muajin korrik regjistroi nivelin 3.4%, niveli më i lartë në afërsisht dy vite e gjysmë.

Banka e Shqipërisë ka preferuar të presë, me shpresën që vala inflacioniste do të jetë kalimtare, por, së paku në komponentin e çmimeve të produkteve energjetike, nuk ka sinjale në horizont për një normalizim të shpejtë të situatës. Norma bazë ngelet në nivelin 2.5%, të paktën deri në vendimmarrjen e ardhshme të politikës monetare, që është e planifikuar në datën 7 tetor.

Tregu i brendshëm financiar gjithsesi ka reaguar me një zhvendosje në rritje të yield-eve gjatë tremujorit të dytë dhe të tretë. Kjo faktorizon një pritshmëri për interesa më të larta, por pjesërisht edhe dinamikat e brendshme të raporteve mes kërkesës dhe ofertës, sidomos pas mesit të vitit.

The post Borxhi afatgjatë i qeverisë bëhet më i shtrenjtë, rritet yield-i i obligacioneve 20-vjeçare appeared first on Fast News Economy.

Sipas informacionit paraprak, të ardhurat totale neto arritën në 41.3 miliardë lekë apo afro 445 milionë euro, duke tejkaluar si planin e muajit, ashtu edhe nivelin e një viti më parë.

Konkretisht të ardhurat rezultuan 0.5 miliardë lekë, ose 1.3% mbi planin, ndërsa krahasuar me gushtin 2025 u arkëtuan 4.2 miliardë lekë më shumë, me një rritje prej 11.2%.

Të ardhurat tatimore përfshijnë të ardhurat nga TVSH neto në vend, tatimi mbi fitimin, tatimi mbi të ardhurat personale, taksat nacionalet, të cilat kanë pasur perfomancë pozitive përgjatë gjithë vitit.

Faktorët kryesore të rritjes së të ardhurave lidhen me rritjen ekonomike, aktivitetin më të lartë të biznesit dhe konsumin e shtuar.

Ndër zërat me rritjen më të lartë është Tatimi mbi Vlerën e Shtuar, i cili lidhet drejtpërdrejt me konsumin në rritje të mallrave dhe shërbimeve përgjatë këtij muaji, nxitur nga fluksi i turistëve dhe ardhja e emigrantëve.

Tatimi mbi të ardhurat personale përbën një tjetër zë me peshë të konsiderueshme në rritjen e të ardhurave tatimore. Ecuria pozitive e këtij zëri lidhet, ndër të tjera, me rritjen e nivelit të pagave në administratën publike dhe në sektorin privat, si dhe me masat e ndërmarra në kuadër të reformës kundër informalitetit.

Në këtë drejtim, masat për formalizimin e aktivitetit ekonomik, përfshirë faturimin elektronik dhe intensifikimin e kontrolleve në terren, duket se kanë ndikuar në rritjen e deklarimit të të ardhurave dhe, për rrjedhojë, në zgjerimin e bazës së tatueshme.

Një ndikim të rëndësishëm në të ardhurat e mbledhura ka pasur edhe dorëzimi i Deklaratës Individuale Vjetore të të Ardhurave (DIVA 2025). Përmes këtij procesi, individët që kanë rezultuar me detyrime tatimore kanë kryer pagesat përkatëse, duke kontribuar në rritjen e arkëtimeve gjatë periudhës.

Në të njëjtën linjë janë edhe të ardhurat nga sigurimet shoqërore dhe sigurimet shëndetësore, të administruara nga Administrata Tatimore, të cilat kanë shfaqur një tendencë rritëse në muajt e fundit. Kjo ecuri reflekton efektet e reformës së pagave, si dhe masat e ndërmarra për reduktimin e nëndeklarimit të pagave dhe formalizimin e marrëdhënieve të punës.

Një faktor tjetër me ndikim është vendosja e pagave referencë në disa sektorë si turizmi, ndërtimi dhe mjekësia, si dhe rritja e pagës minimale, e cila prej 1 janarit 2026 është përcaktuar në 50 mijë lekë.

The post Rriten me 11.2% të ardhurat e tatimeve, ndikuan turizmi dhe pagat appeared first on Fast News Economy.

Inflacioni në Eurozonë u rrit në 3.3% në gusht, nga 2.9% në korrik, duke shtuar presionin mbi Bankën Qendrore Evropiane për një tjetër rritje të normave të interesit. Tregjet financiare po parashikojnë që në mbledhjen e 10 shtatorit, BQE të rrisë normën e depozitave nga 2.25% në 2.50%.

Sipas ekonomistëve të Bankës Qendrore Europiane, Kristina Barauskaitė Griškevičienė dhe Claus Brand, rritja e çmimeve të energjisë është aktualisht faktori kryesor pas përshpejtimit të inflacionit në eurozonë.

Në një analizë të publikuar të martën, ata theksojnë se goditja e tanishme inflacioniste ndryshon ndjeshëm nga ajo e viteve 2021–2022. Këtë herë, kriza po drejtohet kryesisht nga goditja e ofertës së energjisë, ndërsa kërkesa dhe politikat fiskale kanë një rol shumë më të kufizuar.

Sipas analizës së BQE-së, faktorët negativë të ofertës së energjisë përbënin rreth 90% të rritjes së inflacionit të energjisë midis janarit dhe majit 2026. Në të njëjtën periudhë, politikat monetare dhe fiskale ushtruan vetëm një ndikim të lehtë në uljen e presioneve mbi çmimet e energjisë.

Një krizë energjetike ndryshe nga ajo e viteve 2021–2022

Goditja aktuale është nxitur pjesërisht nga lufta në Lindjen e Mesme dhe mbyllja pasuese e Ngushticës së Hormuzit, një prej korridoreve më të rëndësishme të transportit të naftës dhe gazit në botë. Ndryshe nga periudha 2021–2022, kur inflacioni u ushqye nga një kombinim i faktorëve të ofertës dhe kërkesës, kriza aktuale ka në qendër kufizimet në furnizimin me energji. Në vitet 2021–2022, ekonomia globale po përjetonte një rikthim të shpejtë të kërkesës pas pandemisë. Kjo u shoqërua me ndërprerje të zinxhirëve globalë të furnizimit, goditje në furnizimin me energji dhe politika monetare e fiskale mbështetëse. Më pas, pushtimi rus i Ukrainës e përkeqësoi krizën energjetike në Evropë. Për këtë arsye, BQE argumenton se edhe përgjigjja monetare këtë herë duhet të jetë më graduale.

BQE nisi rritjen e normave në qershor

Pas shpërthimit të luftës në Lindjen e Mesme në fund të shkurtit, BQE nuk reagoi menjëherë me rritje të normave. Rritjen e parë e bëri më 11 qershor, duke e çuar normën e depozitave nga 2% në 2.25%.

Ishte rritja e parë e normave të interesit nga BQE pas tre vitesh. Në atë kohë, edhe skenari më optimist i bankës, i cili supozonte një përfundim të shpejtë të luftës, parashikonte se inflacioni nuk do të kthehej në objektivin prej 2% përpara vitit 2027. Por lufta vijon, ndërsa inflacioni është përshpejtuar në 3.3%. Kjo ka rritur pritshmëritë se BQE do të ndërmarrë një tjetër rritje të normës së interesit më 10 shtator.

Për ekonominë e eurozonës, një rritje e normave do të nënkuptonte kredi më të shtrenjta për bizneset dhe familjet, por edhe një përpjekje të bankës qendrore për të parandaluar që goditja e energjisë të shndërrohet në një valë më të gjerë dhe të qëndrueshme inflacioniste.

The post Shtrenjtohen cmimet, Banka Qendrore Europiane në prag të rritjes së normave të interesit appeared first on Fast News Economy.

Sipas ministrit Malaj e gjithë shuma e mbledhur nga rritja do të shkojë si financim për investime të reja publike dhe për shërbime të reja sociale.

Në postimin e tij ministri Malaj deklaron: Të ardhurat publike në 3 vitet e fundit janë rritur me 31 për qind. Kjo tregon rritje ekonomike të qëndrueshme por edhe formalizim të ekonomisë shqiptare.

Për të qenë më konkret në 7 mujorin e parë të këtij viti të ardhurat janë shtuar me rreth 515 milion euro më shumë krahasuar me vitin 2025.

Synimi ynë është që deri në përfundim të vitit t’i kemi rritur të ardhurat publike me 1.2 miliard euro më shumë krahasuar me vitin 2024.

Këto janë para që do të shkojnë për të ndërtuar më shumë shkolla, më shumë qendra shëndetësore dhe spitale, më shumë subvencione në bujqësi, apo për të ofruar shërbime të reja si edhe për të përmirësuar shërbimet ekzistuese”.

The post Ministri Malaj: Do të rrisin investimet publike, objektivi për 1.2 mld euro më shumë të ardhura appeared first on Fast News Economy.

Sipas të dhënave të Bankës së Shqipërisë, vlera e mjeteve të rezervës arriti në rreth 7.9 miliardë  euro, në rritje me 7.9% që nga fillimi i vitit 2026 dhe me 17.2% me bazë vjetore.

Rritja e vazhdueshme e vlerës së rezervës valutore po mbështetet nga blerjet e konsiderueshme të valutës nga Banka e Shqipërisë në tregun e brendshëm valutor.

Sipas të dhënave zyrtare të publikuara deri tani, për tre muajt e parë të vitit 2026 Banka e Shqipërisë bleu rreth 140 milionë euro në tregun e brendshëm valutor.

Kjo është vlera më e lartë historike e blerjeve të Bankës së Shqipërisë në tregun valutor për këtë periudhë të vitit. Krahasuar me të njëjtën periudhë të një viti më parë, blerjet e valutës janë rritur me 320%.

Pavarësisht blerjeve të mëdha të Bankës së Shqipërisë, kursi i këmbimit mes Euros dhe Lekut po vijon rënien dhe ka prekur një rekord të ri historik pranë nivelit të 92.5 lekëve, në rënie vjetore me afërsisht 5%.

Këtë vit, Banka e Shqipërisë do të rrisë më tej blerjet e planifikuara të valutës në tregun e brendshëm. Ajo synon të blejë përmes ankandeve 330 – 450 milionë euro, me objektiv rritjen e rezervës valutore. Objektivi i blerjeve është rritur ndjeshëm krahasuar me projeksionet në intervalin 270-350 milionë euro të parashikuar për vitin 2025.

Megjithatë, blerjet totale të valutës ka të ngjarë të rezultojnë në vlera shumë të mëdha.

Në periudhën 2024-2025, Banka Qendrore bleu më shumë se dy miliardë euro në tregun e brendshëm valutor, me qëllim për të frenuar forcimin e vazhdueshëm të Lekut në kursin e këmbimit.

Ndryshimi i vlerës së aktiveve në valutë të huaj nuk është i lidhur vetëm me volumin e investimeve të reja, por edhe lëvizjet e çmimit të instrumenteve financiare dhe metaleve të çmuara në tregjet ndërkombëtare.

Në mesin e këtij viti, titujt e borxhit përbënin 80% të mjeteve të rezervës, ndërsa depozitat në cash përbënin 12% të saj. Pjesa e mbetur e rezervës është e investuar në ar dhe në të drejta tërheqjeje (SDR) pranë Fondit Monetar Ndërkombëtar (FMN).

Në veçanti, vitin e kaluar rritja e çmimit të arit dha një ndikim pozitiv në vlerën e rezervës valutore. Në gjysmën e parë të këtij viti, çmimet e arit paraqiten në rënie. Kjo ka sjellë edhe rënie të vlerës së rezervave të arit në 412 milionë euro, 4.2% më pak krahasuar me fundin e vitit 2025.

Megjithatë, rënia e vlerës së arit është kompensuar dhe tejkaluar nga blerjet e reja të valutës dhe nga rritja e vlerës së titujve financiarë ku është investuar rezerva valutore.

Rezerva valutore është instrument i rëndësishëm për të amortizuar goditje të mundshme, të lidhura si me deficitin e llogarisë korrente, ashtu edhe me nivelin e lartë të Euroizimit të sektorit financiar në vend.

Misioni i FMN për Shqipërinë, në deklaratën e fundit, të vitit 2025, megjithatë, i rekomandonte Bankës së Shqipërisë një qasje më të kujdesshme në rritjen e mëtejshme të rezervës valutore. Sipas misionit të FMN-së, përfitimet nga akumulimi i rezervave duhet të peshohen ndaj kostove oportune në rritje, rreziqeve të normave të interesit dhe humbjeve të mundshme nga rivlerësimi valutor.

Rritja e rezervës valutore ka sjellë kosto të konsiderueshme në bilancin e Bankës së Shqipërisë, si rezultat i forcimit të kursit të këmbimit të monedhës vendase. Për vitin 2025, humbjet neto nga ndryshimet e kurseve të këmbimit kishin vlerën e 24.1 miliardë lekëve. Humbjet në këtë zë u rritën me 79% krahasuar me një vit më parë.

The post Rezerva valutore arrin pranë kufirit të 8 miliardë eurove appeared first on Fast News Economy.